Legion Ya Maria

Manuel ya Legion ya Maria kele mukanda ya kisalu ya konso kilumbu ya balegionnaire. Yo kele tendula kisina ya Legion, kikuma na yo ye mpi mutindu na yo ya kusala na ntoto mvimba.Manuel kele songa ntete kifulua ya Legion ya Maria na kati ya Dibundu Katolika : Legion kele ndonga ya balaïke ya kele sosa ntete lusantisu na bo mosi ye mpi kusala apostolat na kati ya Dibundu. Bo kele baka mbandu ya kimukristu na bo na Maria: kusamba na bo, kulonguka na bo, kusala na bo bonso Maria ye kumosi ti yandi. Na nima, Manuel kele tendula mutindu Legion fwete tambula. Kutambula na yo kele landa mambu ya Legion ya ntama ya Roma : na kikesa to bulemfu na bo, na luzitu ya bansiku to na ndonga ya balukutakanu na bo, na lutondo to na mbamba na kulungisa bisalu ya nene. Na bifulu yonso na ntoto mvimba, bo fwete sadila Manuel na mambu yonso. Balegionnaire kele kudibingaka basoda ya Maria, ya kele nwana vita sambu na kugulusa mioyo ya bantu. Bandambu mingi ya Ndinga ya Nzambi to ya malongi ya bapapa to ya basantu ya nkaka kele kwisa kupesa kilo na bansiku ti mambu yonso ya Manuel kele lomba.